Descripción
Pódese acceder á baía por unha entrada principal (desde o W, por cabo Silleiro) ou polo N, con determinadas restricións. Para os que proceden do S ou de alta mar, a entrada será a principal. Cabo Silleiro será a referencia para a aproximación e a súa localización será o único obstáculo, se se navega de noite ou con pouca visibilidade. Demorando o cabo Vicos (Cíes), entre o 020° e o 032°, o noso rumbo de entrada debe ser 86°. A enfilación sinalada na carta non vai ser fácil de localizar, polo que se recomenda guiarse polo propio castelo do Parador de Monte Real ata avistar a luz do dique que dá acceso ao club. Nesta entrada só obstaculizan a ampla canle os baixos próximos a cabo Silleiro e os baixos dos Carallóns, que forman barreira natural coas Serralleiras e as illas Ronseis.
Se se procede da Ría de Vigo ou das illas Cíes, resulta máis conveniente a canle existente entre Monteferro e as illas Ronseis. O único problema é o calado. Se non hai mar de fondo, pódese entrar con embarcacións deportivas de ata 3 metros de calado, ata en baixamar. Para iso, débese evitar o centro da canle, aproximándonos máis ás illas. Superada a boca da canle, podemos dirixirnos directamente á punta do dique ou utilizar como referencia o castelo.
